ភ្នំពេញ៖ ដើម្បីឱ្យការចូលរួមទស្សនាការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នាពេលឆាប់ៗខាងមុខនេះ ប្រកបដោយការទទួលខុសត្រូវចូលរួមរក្សាសុវត្ថិភាពសុខភាព ក្រសួងសុខាភិបាលណែនាំឱ្យរួមគ្នាអនុវត្ត បញ្ចៀសបាននូវការប្រជ្រៀតគ្នា ឬច្រានគ្នា ដែលអាចឈានដល់មានបញ្ហាដួល ឬដួលសន្លប់ ឬបញ្ហាជាន់គ្នាជាដើម។
សេចក្តីណែនាំរបស់ក្រសួងសុខាភិបាលចេញនៅថ្ងៃទី២៧ ខែមេសា ឆ្នាំ២០២៣ ក្រសួងអំពាវនាវពលរដ្ឋកុំច្រាន ឬប្រជ្រៀតគ្នា ដោយមិនត្រូវប្រមូលផ្តុំគ្នានៅកន្លែងតែមួយដែលណែនកកស្ទះ ឬចង្អៀតពេកនោះទេ ដើម្បីទប់ស្កាត់នូវការដួលសន្លប់ ដែលអាចកើតមានជាយថាហេតុ និងអាចទៅជាដួលជាន់គ្នាក៏អាចមានដែរ ជាពិសេសកុំច្រានគ្នាឲ្យសោះ។ ក្នុងករណីវិលមុខ ឬស្រវាំងភ្នែក សុំអង្គុយចុះ និងហៅរកអ្នកជួយសង្គ្រោះ។
ក្រសួងសុខាភិបាលស្នើឱ្យចូលរួមរក្សាសណ្ដាប់ធ្នាប់ និងកុំនៅកន្លែងដែលកកកុញពេក ហើយត្រូវរកកន្លែងឈរឱ្យរៀងស្រឡះៗ ហើយលៃលកយ៉ាងណាត្រូវឈរឲ្យបានតិចជាង ៥នាក់ ក្នុង ១ម៉ែត្រការ៉េ ដើម្បីសុវត្ថិភាព។ បើមានការដួលមិនទាន់សន្លប់ ឬការដួលសន្លប់ សុំកុំនាំគ្នាទៅរោមអ្នកដួលនោះ សុំជួយហៅរកការជួយសង្គ្រោះឲ្យបានលឿនបំផុត និងត្រូវចេះអធ្យាស្រ័យឲ្យគ្នាទៅវិញទៅមក។
ក្រសួងសុខាភិបាលក៏បានក្រើនរំលឹកឱ្យប្រុងប្រយ័ត្នចំពោះចំណីអាហារ ដែលអាចបង្កការរាករូស រាកមួល ចុកពោះ ចង្អោរ-ក្អួត ដែលភាគច្រើនបណ្តាលមកពីការបរិភោគចំណីអាហារ ឬការពិសារម្ហូបអាហារដែលមិនស្អាត ដោយមានមេរោគ ឬចំណីអាហារដែលមិនមានសុវត្ថិភាពល្អ ឬអាចធ្វើឲ្យពុលចំណីអាហារតែម្ដង ឬដោយសារអាហារ ឬភេសជ្ជៈណាមួយដែលមានសារជាតិពុល។ ជាមួយគ្នានេះត្រូវអនុវត្តវិធានការថែរក្សាអនាម័យស្អាត ធានានូវសុវត្ថិភាពចំណីអាហារ បរិភោគចំណីអាហារឆ្អិនល្អ និងពិសារទឹកស្អាត ឬទឹកដាំពុះ។
គូសបញ្ជាក់ថា ក្រសួងសុខាភិបាលនឹងរៀបចំរថយន្តសង្រ្គោះបន្ទាន់ចំនួន ១១៤គ្រឿង ដោយពង្រាយក្រុមគ្រូពេទ្យសរុបចំនួន ៨៣៣នាក់ ទៅប្រចាំការនៅតាមទីតាំងប្រកួតកីឡាស៊ីហ្គេមក្នុងរាជធានីភ្នំពេញ ខេត្តសៀមរាប ព្រះសីហនុ កំពត និងខេត្តកែប ដែលនឹងប្រព្រឹត្តិចាប់ពីថ្ងៃទី០៥-១៧ ខែឧសភា ឆ្នាំ២០២៣៕
